پشاور (ای پی آئی ) پی ٹی آئی کے سابق رہنما پرویز خٹک کی جانب سے پاکستان تحریک انصاف کے چیئرمین کے خلاف بیانات پر ترجمان پاکستان تحریک انصاف جاری بیان میں کہا ہے کہ پرویزخٹک چیئرمین پی ٹی آئی پرالزام لگاکر کھوئی ہوئی عزت بحال نہیں کر سکتے۔
پرویز خٹک کا چیئرمین پی ٹی آئی اور پارٹی کے خلاف بیان سراسر لغو، بے بنیاد اور جھوٹ پر مبنی ہے، پرویز خٹک چیئرمین پی ٹی آئی کو 9 مئی کے واقعات کا ذمہ دار ٹھہرا رہے ہیں جو سراسر جھوٹ ،بے ہودہ اور بے بنیاد ہے۔
ترجمان پی ٹی آئی نے کہا کہ پرویز خٹک پارٹی کے عہدوں سے علیحدگی اختیار کرنے کے بعد ان الزامات سے قوم کو گمراہ کرنے کی کوشش کر رہے ہیں جبکہ وہ بطور صوبائی صدر پارٹی کے تمام فیصلوں میں مکمل طور پر شریک ہونے کے ساتھ ساتھ اسٹیبلشمنٹ کے ساتھ بھی رابطے میں تھے۔
ترجمان پی ٹی آئی نے کہا کہ پرویز خٹک کو پریس کانفرنس کے بعد چیئرمین پی ٹی آئی کے فیصلے غلط نظر آنے لگے، اگر انہیں پارٹی کے کئے ہوئے فیصلوں سے اختلاف تھا تو اسی وقت عہدے اور پارٹی رکنیت سے مستعفی کیوں نہ ہوئے؟ ، کیا وجہ ہے کہ اپنے خیالات کا اظہار کرنے کیلئے انہوں نے 9 مئی کا انتظار کیا۔
ترجمان نے کہا کہ نو مئی کے ہنگاموں کے وقت چیئرمین پی ٹی آئی ریاست کی قید میں تھے اور ان کا کسی سے کوئی رابطہ نہیں تھا، پرویز خٹک کو پارٹی رہنمائوں کو پارٹی چھوڑنے پر اکسانے کیلئے شو کاز نوٹس جاری کیا گیا۔
ترجمان نے کہا کہ پرویز خٹک جھوٹے الزامات لگانے کی بجائے فیصلہ کریں کہ انہوں نے پارٹی میں رہنا ہے کہ نہیں، شاید پرویز خٹک اس قسم کے الزامات کے ذریعے نئی کنگز پارٹی میں اپنے لئے کسی مرکزی عہدے کی راہ ہموار کر رہے ہیں، پرویز خٹک اچھی طرح جانتے ہیں کہ تحریک انصاف چھوڑنے کے بعد ان کا سیاسی مستقبل ختم ہو چکا ہے۔
ترجمان پی ٹی آئی نے مزید کہا کہ چیئرمین پی ٹی آئی یا پارٹی پر بے بنیاد الزمات لگا کر یہ اپنی کھوئی ہوئی عزت بحال نہیں کر سکتے ، پاکستانی قوم تمام لوٹوں کو پہلے ہی یکسر مسترد کر چکی ہے،
ان جھوٹ پر مبنی بے ہودہ ہتھکنڈوں سے پرویز خٹک سمیت تمام منحرف اراکین قوم میں اپنی رہی سہی عزت بھی گنوا دیں گے۔