لاہور (ای پی آئی )وزیراعلیٰ پنجاب مریم نواز شریف اور چیف آف آرمی اسٹاف جنرل سید عاصم منیر نے کسانوں کو تمام زرعی سہولیات ایک چھت تلے فراہم کرنے کے منصوبے کا آگاز کر دیا ،
افتتاحی تقریب کنڈائی اور شاپو کے علاقوں میں منعقد ہوئی۔وزیراعلیٰ پنجاب مریم نواز شریف اور چیف آف آرمی اسٹاف جنرل سید عاصم منیر تقریب میں شریک ہوئے، جبکہ نیشنل فوڈ سیکیورٹی کے وفاقی وزیر رانا تنویر حسین، وفاقی وزیر آبی وسائل ڈاکٹر مصدق ملک اور پنجاب کی سینیئر وزیر مریم اورنگزیب سمیت دیگر وزرا بھی موجود تھے۔اس موقع پر ’گرین ایگری مال اینڈ سروسز کمپنی‘، سمارٹ ایگری فارم، زرعی تحقیق اور سہولت مرکز کا افتتاح کیا گیا۔ یہ ادارہ کسانوں کو ان کے گھروں کے دروازے پر معیاری بیج، کھاد اور کیڑے مار ادویات رعایتی نرخوں پر فراہم کرے گا،
جبکہ ڈرونز سمیت جدید زرعی مشینری بھی کم قیمت پر دستیاب ہوگی۔پانچ ہزار ایکڑ پر مشتمل جدید زرعی فارم کا بھی آغاز کیا گیا، جہاں جدید زرعی طریقے اور آبپاشی کے جدید نظام کو استعمال میں لایا جائے گا، جس سے کم پانی میں زیادہ پیداوار ممکن ہوگی۔ زرعی تحقیق اور سہولت مرکز میں زمین کی جانچ سمیت تمام زرعی خدمات بھی فراہم کی جائیں گی اور ملک بھر کے زرعی تحقیقی اداروں سے تعاون کو یقینی بنایا جائے گا
وزیراعلیٰ مریم نواز شریف نے تقریب سے خطاب کرتے ہوئے کہا کہ آج پنجاب میں جدید زراعت کے انقلاب کی بنیاد رکھ دی گئی ہے۔ ان منصوبوں کا آغاز کسانوں کی ترقی کے ایک نئے دور کا آغاز ہے۔
ان کا مزید کہنا تھا کہ زراعت کی ترقی درحقیقت کسان کی خوشحالی اور پاکستان کی معیشت کی مضبوطی کی ضمانت ہے۔آرمی چیف جنرل سید عاصم منیر نے اپنے خطاب میں کہا کہ پنجاب پاکستان کا زرعی پاور ہاؤس بن چکا ہے اور جدید زراعت میں یہاں کے کسانوں کا قائدانہ کردار قابل تحسین ہے۔
انہوں نے مختصر وقت میں پنجاب حکومت کے ’گرین کارپوریٹ منصوبے‘ کے تحت ہونے والی کامیابیوں کو سراہا اور یقین دہانی کرائی کہ فوج ملک کی معاشی ترقی میں بھرپور حمایت جاری رکھے گی۔تقریب کے دوران وزیراعلیٰ مریم نواز شریف نے شہداء کے بچوں اور زخمی غازیوں کو زمین کی الاٹمنٹ کے خطوط بھی دیے، جو حکومت کے کسانوں اور عوام کی فلاح و بہبود کے عزم کا مظہر ہے۔