نوشہرو فیروز (ای پیآئی ) انسداد دہشتگردی کی عدالت نوشہروفیروز نے گرینڈ ڈیموکریٹک الائنس(جی ڈی اے) کے رہنما غلام مرتضیٰ خان جتوئی کی ضمانت منظور کرلی لیکن رہائی نہ ہوسکی۔
عام انتخابات کے دوران مورو کے پولنگ اسٹیشن علی بخش سولنگی میں فائرنگ کے واقعہ میں قتل ہونے والے پاکستان پیپلزپارٹی کے کارکن بلاول زرداری کیس میں نامزد جی ڈی اے رہنما غلام مرتضیٰ خان جتوئی کو دو لاکھ روپے مچلکے جمع کروانے پر ضمانت دی گئی۔
جی ڈی اے رہنما غلام مرتضیٰ خان جتوئی کے وکیل عبداللہ خان کورائی کے مطابق متعلقہ عدالت نے ایک روز قبل غلام مرتضیٰ خان جتوئی کو ڈسٹرکٹ جیل نوشہرو فیروز کی تحویل میں دیا تھا۔ لیکن جیل انچارج نے انکو رات گئے حیدرآباد نارا جیل منتقل کردیا تھا اور آج انکو پیش بھی نہیں کیا گیا .
اطلاعات کے مطابق جج صاحب نے جیل انتظامیہ پر برہمی کا اظہار کیا جس پر جیل انچارج نوشہروفیروز کا کہنا تھا کہ غلام مرتضیٰ خان جتوئی کو آئی جی جیل خانہ جات کے حکم پر حیدراباد نارا جیل منتقل کیا گیا تھا۔
غلام مرتضیٰ خان جتوئی کے وکلاء عبداللہ کورائی گلزار عالمانی نے مزید یہ بھی بتایا کہ ضلع لاڑکانہ کے مختلف تھانوں پر 2 مزید کیس کی ضمانت حاصل کرنے کے لئے وکلا کی ٹیم لاڑکانہ میں موجود ہے۔ ان کا یہ بھی کہنا تھا کہ 70 سالا بزرگ سیاستدان کی زندگی کو خطرہ ہے ان کو ادویات کی رسائی بھی نہیں دی جارہی۔