پشاور (ای پی آئی ) خیبر پختونخواہ کے علاقہ خیبر کے باڑہ بازار میں واقع پولیس سٹیشن کے نزدیک دھماکے میں ایک پولیس اہلکار شہید جبکہ 10افراد زخمی ہوگئے۔دھماکے کی آواز دور دور تک سنائی دی گئی،
دھماکے کے بعد پولیس نے علاقے کو گھیرے میں لے لیا اور ریسکیو اہلکار جائے وقوعہ پر پہنچ گئے ۔
خیبر پولیس کے مطابق باڑہ بازارمیں تھانے کے مرکزی گیٹ کے قریب دھماکا ہوا ہے، ریسکیو کی جانب سے زخمیوں کو ہسپتال منتقل کیا جارہا ہے۔
خیبر پولیس کا کہنا ہے کہ دھماکے کے بعد شدید فائرنگ بھی کی گئی ، جس کے نتیجے میں پولیس اہلکاروں سمیت 10افراد زخمی ہوئے ہیں ۔
ترجمان ریسکیو کے مطابق ایک پولیس اہلکار موقع پر شہید ہوگیا جبکہ زخمیوں میں ایک ایچ ایم سی،3 زخمیوں کو مقامی ہسپتال منتقل کیا گیا جبکہ 6 زخمیوں کو موقع پر طبی امداد فراہم کی گئی ہے ۔
ریسکیو1122 کے مطابق دھماکے سے عمارت کی چھت گرنے سے ایک شخص دب گیا، جس کو نکالنے کیلئے ہیوی مشینری روانہ کردی گئی ہے ۔
پولیس کے مطابق کمپاؤنڈ کے اندر باڑہ تھانہ، سرکاری اور دیگر اہم دفاتر ہیں جبکہ تھانے کے اندر سی ٹی ڈی سیل بھی ہے۔
پولیس کا کہنا ہےکہ ابتدائی تحقیقات کے نتیجے میں باڑہ بازار میں دھماکا بظاہرخودکش لگ رہا ہے۔واضح رہے کہ گزشتہ روزبھی خیبرپختونخوا کے دارالحکومت پشاورمیں دہشت گردوں کے حملے میں 2 پولیس اہلکار شہید جبکہ 2 زخمی ہوئے تھے۔