لاہور (ای پی آئی ) پاکستان کرکٹ ٹیم کے کپنان بابر اعظم نے ٹیم کے ہمراہ ورلڈ کپ میں شرکت کیلئے روانگی سے قبل اپنے ٹوئٹر اکائونٹ پرپاکستان کرکٹ شائقین کے لئے اہم پیغام جاری کرتے ہوئے کہا ہے کہ ہم ورلڈکپ کیلئے روانہ ہورہے ہیں، میری درخواست ہے کہ شائقین کرکٹ ہمیں سپورٹ کریں اور نیک خواہشات کا اظہار کریں۔
انھوں نے مزید کہا کہ مجھے یقین ہے کہ فینز کی سپورٹ اور محبت کا سلسلہ جاری رہے گا۔
قومی ٹیم رات گئے بھارت میں کرکٹ ورلڈکپ میں شرکت کیلے علامہ اقبال انٹرنیشنل ایئرپورٹ سے دبئی روانہ ہوئی۔ 15 رکنی اسکواڈ کے ساتھ 3 ریزرو کھلاڑی شامل، کوچز اور معاون عملہ سمیت 13 ارکان بھی اسکواڈ میں شامل ہیں۔
بولنگ کوچ مورنے مورکل آج دبئی میں جوائن کریں گے جبکہ ٹیم ڈائریکٹر مکی آرتھر 30 ستمبر کو براہ راست بھارت پہنچیں گے۔
دوسری جانب قومی ٹیم دبئی میں 9 گھنٹے قیام کے بعد اسکواڈ کی اگلی منزل حیدرآباد ہوگی، قومی اسکواڈ بھارتی وقت کے مطابق رات 8:15 حیدرآباد پہنچے گا۔
واضح رہے کہ گرین شرٹس کو اپنا اگلا وارم اَپ میچ اگلے ہی روز نیوزی لینڈ کے خلاف کھیلنا ہے بعدازاں 3 اکتوبر کو آسٹریلیا کے خلاف میدان میں اُترے گی۔
