لاہور( ای پی آئی)سال 2024 اسٹاک مارکیٹ کیلئے یادگار سال رہا،سال 2024 میں مارکیٹ نے تاریخی سنگ میل عبور کیے ،سرمایہ کاروں کو بھاری منافع دے کر نہال کردیا۔سال 2024 میں پاکستان اسٹاک ایکسچینج نے نئے آسمان چھولئے۔ سرمایہ کاروں کو 78 فیصد ریٹرن دینے کا ریکارڈ بنادیا۔ پہلی بار 1 لاکھ پوائنٹس کا سنگ میل عبور کیا ہنڈریڈ انڈیکس 62 ہزار451 پوائنٹس سے بڑھتے بڑھتے ایک لاکھ 17 ہزار پوائنٹس کی تاریخی سطح عبور کرگئی۔
غیر ملکیوں نے شیئرز بیچ کر پاکستان کی اسٹاک مارکیٹ سے 12 کروڑ ڈالرز کا سرمایہ نکال لیا اور ایسا پہلی بار ہوا کہ فارنرز کی سیلنگ کے باوجود مارکیٹ نہیں گری۔اسٹاک مارکیٹ نے سال 2024 میں گولڈ، ڈالر اور قومی بچت اسکیمز کی نسبت کہیں زیادہ منافع دیا۔
اسٹاک مارکیٹ ایک سال میں منافع 75 فیصد، گولڈ ایک سال میں منافع 24 فیصد، قومی بچت اسکیمز ایک سال میں منافع اوسطاً17 فیصد، ڈالر میں سرمایہ کاری منافع کے بجائے الٹا ایک فیصد منفی رہی۔
دسمبر کے ایسے ہی دو سیشنز میں ایک دن میں اسٹاک مارکیٹ 4700 پوائنٹس کی تیزی کا تاریخی ریکارڈ بنا تو وہیں ایک دن 4800 پوائنٹس کی تاریخی مندی کا ریکارڈ بھی مارکیٹ نے اپنے نام کیا۔سال 2024 میں میں 7 نئی کمپنیوں نے اسٹاک ایکسچینج میں لسٹ ہوکر عوام کو 8.5 ارب روپے کے شیئرز بیچ کر اپنے کاروبار میں حصہ دار بنایا۔ تاہم پاک سوزوکی موٹرز اپنے شیئرز واپس خرید کر اسٹاک مارکیٹ سے ڈی لسٹ ہوگئی۔