اسلام آباد(محمد عالی جاہ خان ) پاکستان کرکٹ بورڈ (پی سی بی) نے ٹی ٹوئنٹی ورلڈکپ میں پاکستان ٹیم کی شرکت کے دوران میں احتجاج کے مختلف آپشنز پر غور شروع کردیا ہے.
ذرائع کے مطابق چئیرمین پی سی بی محسن نقوی نے بورڈ حکام اور سابق کھلاڑیوں سے مشاورت بھی کی ہے. اورمحسن نقوی بنگلہ دیش ٹیم کے حق میں بول چکے ہیں.
ذرائع کا کہنا ہے کہ محسن نقوی نے پی ایس ایل ورکشاپ میں گفتگو کے دوران کہا ہے کہ بنگلہ دیش کے ساتھ زیادتی ہوئی ہے بنگلہ دیشی ٹیم کو اکیلا نہیں چھوڑ سکتے،
ذرائع کا کہنا ہے کہ پہلے آپشن میں بنگلہ دیش سے اظہار یکجہتی کیلئے پاکستانی کھلاڑی ٹی ٹوئنٹی ورلڈ کپ کے میچوں میں سیاہ پٹیاں باندھ کر شرکت کرسکتے ہیں۔
دوسرے آپشن میں پاکستان ٹیم بھارتی رویے پر بھارت کے خلاف پندرہ فروری کو ہونے والے میچ کا بائیکاٹ کرے گی. جبکہ تیسرا آپشن ٹی ٹوئنٹی ورلڈ کپ میں ہر میچ کی جیت کو بنگلہ دیش کرکٹ فینز کیلئے وقف کئے جانے کا ہے
ذرائع کا کہنا ہے کہ ٹی ٹوئنٹی ورلڈ کپ میں شرکت اور آپشنز کا حتمی فیصلہ وزیراعظم شہباز شریف کریں گے۔ پاکستان ٹیم کی ورلڈ کپ میں شرکت پر وزیراعظم شہباز شریف اور چئیرمین پی سی بی محسن نقوی کی ملاقات آج متوقع ہے.
