پیرس(ای پی آئی)پاکستانی کے معروف اداکار فواد خان اور صنم سعید کی ویب سیریز برزخ مارچ میں فرانس میں ہونے والے سیریز مینیا فلم فیسٹیول میں پیش کی جائے گی۔
یہ فلم وقاص حسن اور شیلجا کیجریوال نے پروڈیوس کی ہے۔فرانس میں ہونے والے اس فلم فیسٹیول میں بھارتی اسٹریمنگ پلیٹ فارم زندگی اوریجنل کی سیریز برزخ وہ واحد ویب سیریز ہے جسے ساوتھ ایشیا سے منتخب کیا گیا ہے۔
فلمساز عاصم عباسی کی اگلی فلم برزخ سے ناظرین کو بہت سی توقعات وابستہ ہیں، ناظرین کے لیے اس فلم کی خاص بات یہ ہے کہ اس میں ماضی کے مقبول ڈرامہ زندگی گلزار ہے کے سپر ہٹ جوڑے فواد خان اور صنم سعید مرکزی کردار ادا کررہے ہیں۔
میڈیا رپورٹس کے مطابق فواد خان اس سیریز میں تنہا والد کے روپ میں نظر آئیں گے جبکہ صنم سعید ایک پوشیدہ اور پراسرار لیکن ہمدر کردار ادا کرتے نظر آئیں گی اس ویب سیریز کو بہترین سیریز، بہترین ہدایت کار، بہترین اداکارہ، بہترین اداکار کے ساتھ ساتھ اسٹوڈنٹ جیوری ایوارڈ کے لیے بھی نامزد کیا گیا ہے۔ہدایت کار عاصم عباسی نے ایک بیان میں کہا کہ برزخ ایک فیملی ڈرامہ ہے، کہانی سپر نیچرل کرداروں کے گرد گھومتی ہے۔
انہوں نے تفصیلات بتاتے ہوئے کہا کہ کہانی کی ابتدا ذاتی نقصان اور اس کے ساتھ آنے والے خوف سے ہوتی ہے، سیریز مینیا میں برزخ کا انتخاب ہم سب کے لیے ایک بہت اہم ہے، اس لیے نہیں کہ یہ میرے دل کے بہت قریب ہے بلکہ یہ کہانی ہمارے مضبوط یقین کی عکاسی کرتی ہے۔واضح رہے کہ فواد خان اور صنم سعید کی ماضی کے مقبول ڈرامے زندگی گلزار ہے میں جوڑی کو کافی سراہا گیا تھا اور مذکورہ ڈرامے کو بھارت میں بھی خوب پسند کیا گیا تھا۔
فواد خان بھارت میں اے دل ہے مشکل اور کپور اینڈ سنز جیسی فلموں میں کام کر چکے ہیں اور وہاں ان کے لاکھوں مداح ہیں۔جب کہ صنم سعید بھی ویب سیریز قاتل حسیناوں کے نام میں کام کرچکی ہیں۔
