کراچی(ای پی آئی )جناح کنونشن سینٹر اسلام آباد میں آئی سی بی سی بینک کے زیر اہتمام ”آر ایم بی کے استعمال کو سرحد پار تصفیہ میں فروغ دینا” کے موضوع پر ایک تقریب سے خطاب کرتے ہوئے گورنر اسٹیٹ بینک جمیل احمد نے کہا ہے کہ پاکستان میں قواعد و ضوابط کے لحاظ سے چینی کرنسی آر ایم بی کو دیگر بین الاقوامی کرنسیوں جیسے کہ امریکی ڈالر، یورو اور جاپانی ین کے مساوی حیثیت حاصل ہے۔
انھوں نے کہا کہ پاکستان میں سرکاری اور نجی دونوں شعبے دو طرفہ تجارت اور سرمایہ کاری کی سرگرمیوں کے لیے آر ایم بی کا انتخاب کرنے کے لیے آزاد ہیں، چین کے ساتھ تجارت میں آر ایم بی کے استعمال کو فروغ دینے کی مرکزی بینک کی کوششوں کے نتیجے میں چین سے پاکستان کی آر ایم بی میں درآمدات مالی سال 18 میں تقریباً 2 فیصد سے بڑھ کر مالی سال 22 میں تقریباً 18 فیصد ہو گئی ہیں۔
انھوں نے کہا کہ چین کے ساتھ سرحد پار تجارت اور سرمایہ کاری کے لین دین کو طے کرنے کے لیے رینمنبی (آر ایم بی ) کا استعمال ان تعلقات کو مزید مضبوط بنا سکتا ہے، یہ تقریب پیپلز بینک آف چائنا (پی بی او سی ) کی جانب سے پاکستان میں آر ایم بی کلیئرنگ ایجنٹ کے طور پر بینک کی نامزدگی کے لیے منعقد کی گئی تھی۔
