کراچی(ای پی آئی ) لاپتہ افراد کی بازیابی سے متعلق دائر درخواستوں پر سندھ ہائیکورٹ میں سماعت ،عدالت نے شہریوں کو بازیاب کرانے اور محکمہ داخلہ، محکمہ پولیس اور دیگر اداروں کو رپورٹ پیش کرنے کا حکم دیدیا۔
تفصیل کے مطابق سندھ ہائیکورٹ کےجسٹس نعمت اللہ پھلپھوٹو کی سربراہی میں دو رکنی بینچ کے روبرو لاپتہ افراد کی بازیابی سے متعلق درخواستوں کی سماعت ہوئی۔
سندھ پولیس نے 6 لاپتہ افراد کا سراغ لگا لیا اور پیش رپورٹس عدالت میں جمع کرادی۔
رپورٹ میں کہا گیا کہ شہری رفاقت علی، ذوالفقار علی، گل حسین اور زاہد حسین شارع فیصل پولیس کو مطلوب تھے۔ چاروں شہری مختلف مقدمات میں جیل میں ہیں۔ شہری فیصل عباس اور ایاز مختلف مقدمات میں سچل پولیس کو مطلوب تھے۔ دونوں شہری دوسرے مقدمات میں جیل میں ہیں۔
عدالت نے پولیس کے بعد شہریوں کی بازیابی سے متعلق درخواستیں نمٹادیں۔
عدالت نے شہری سبحان جتوئی، کم سن لڑکی علیشاہ، سلیم الرحمٰن اور نعمت اللہ، صوفی شاہ عنایت اور سہیل احمد کی فوری بازیابی کا حکم دے دیا۔
عدالت نے محکمہ داخلہ، پولیس اور دیگر اداروں کو 14 نومبر تک پیش رفت رپورٹ جمع کرانے کا حکم دیدیا۔
