لاہور(ای پی آئی )پنجاب اسمبلی میں مبینہ بھرتیوں کے مقدمے میں گرفتار پاکستان تحریک انصاف کے رہنما اور سابق وزیر اعلیٰ پنجاب چوہدری پرویز الٰہی کے جوڈیشل ریمانڈ میں 14 روز کی توسیع کر دی گئی۔
تفصیل کے مطابق پنجاب اسمبلی میں مبینہ بھرتیوں کے مقدمے میں گرفتار پرویز الہٰی کو ضلع کچہری میں جوڈیشل مجسٹریٹ کی عدالت میں پیش کیا گیا۔جوڈیشل مجسٹریٹ عمران عابد نے پرویز الہٰی کے خلاف اینٹی کرپشن کی درخواست پر سماعت کی۔
عدالت نے جیل میں پرویز الہٰی کی فیملی اور وکلاء سے ملاقات کی درخواست منظور کرتے ہوئے جوڈیشل ریمانڈ میں 14 روز کی توسیع کر دی۔
عدالت نے سماعت 30 نومبر تک ملتوی کر دی۔
چودھری پرویز الٰہی نے کمرہ عدالت میں صحافیوں سے غیررسمی گفتگو کرتے ہوئے ہوئے کہاکہ خدا کی قسم مجھے آج تک کسی نے پریس کانفرنس کا نہیں کہا،چیئرمین پی ٹی آئی میرے ساتھ والے سیل میں ہیں۔
چیئرمین پی ٹی آئی کو اتنے ووٹ پڑیں گے جس کی کوئی حد نہیں ہوگی،ان کا کہناتھا کہ ن لیگ کے پاس لاہور سمیت پورے پاکستان میں الیکشن کیلئے بندے نہیں ہیں،ہمارے اسٹیبلشمنٹ کے ساتھ ہمیشہ ہی اچھے تعلقات رہے ہیں۔
پرویز الٰہی نے کہاکہ چیئرمین پی ٹی آئی کے ساتھ کھڑے ہیں اور کھڑے رہیں گے،ان کاکہناتھا کہ الیکشن کی تاریخ سپریم کورٹ کے کہنے پر ملی ہے،اس الیکشن میں دھاندلی نہیں ہوگی۔
