کراچی(ای پی آئی ) سندھ ہائیکورٹ میں لاپتہ افراد کی بازیابی سے متعلق درخواستوں پر سماعت ،عدالت کی جانب سے لاپتہ افراد کا سراغ لگانے میں کوتاہی برتنے والے تفتیشی افسر ان کے خلاف بھی کارروائی کا عندیہ
تفصیل کے مطابق سندھ ہائیکورٹ میں لاپتہ افراد کی بازیابی سے متعلق درخواستوں کی سماعت ہوئی،تحقیقات میں پیش رفت نہ ہونے پر عدالت نے تفتیشی افسران پراظہار برہمی کیا۔
دوران سماعت سرکاری وکیل نے کہاکہ اورنگی ٹاؤن سے لاپتہ شہری ظفر کا سراغ لگانے کی کوشش کی جارہی ہے،
عدالت نے تفتیشی افسرسے استفسار کیا ایک مہینے کا وقت دیا تھا آج کیا کرکے لائے ہو؟تفتیشی افسر نے کہاکہ پہلے والے تفتیشی افسر کا تبادلہ ہو گیا ہے، عدالت نے کہاکہ جو جو تحقیقات ہو چکی ہیں وہ تو ریکارڈ پر ہوں گی؟ لوگوں کے صبر کا پیمانہ لبریز ہورہاہے۔عدالت نے کہاکہ لاپتہ افراد کا سراغ لگانے میں کوتاہی برتنے والے تفتیشی افسر کے خلاف بھی کارروائی ہوگی،
جسٹس نعمت اللہ نے کہاکہ تفتیشی افسران کو شہریوں کو لاپتہ کرنے والے ملزمان کی فہرست میں شامل کرلیں،ہمیں ایک ایک دن کی پیشرفت سے آگاہ کیا جائے،تحقیقات میں پیشرفت نہ ہوئیں تو عدالت سمجھے گی یہ بھی شریک جرم ہیں،
عدالت سمجھے گی تفتیشی افسران نے بھی شہریوں کو لاپتہ کرنے میں مدد کی۔عدالت نے تفتیشی افسر اور دیگر اداروں سے 18دسمبر کو رپورٹ طلب کرلی۔
