لاہور (ای پی آئی) پاکستان تحریک انصاف کے چیئرمین و سابق وزیر اعظم عمران خان حملے کے ملزم نوید کے اعترافی بیان کی ریکارڈنگ کی حقیقت سامنے آگئی،عمران خان پر حملے کے بعد گرفتار ہونے والے ملزم نوید بشیر کا ویڈیو ریکارڈ آر پی او گجرات کے کمرے میں ریکارڈ کی گئی۔
سی سی ٹی وی میں دیکھا جا سکتا ہے کہ ڈی پی او گجرات اپنا موبائل فون ایس ایچ او کے حوالے کرتے ہیں، ایس ایچ او نے اس موبائل فون سے ملزم نوید کا اعترافی بیان ریکارڈ کیا۔ویڈیو میں دیکھا جا سکتا ہے کہ ایس ایچ او نے ملزم کا بیان ریکارڈ کرنے کے بعد موبائل فون ڈی پی او کو واپس دیا، مبینہ ویڈیو میں بیان ریکارڈ کراتے ہوئے ملزم نظر نہیں آرہا۔
فوٹیج پر تاریخ 3نومبر 2022ء اور ریکارڈنگ کا وقت پانچ بج کر 28منٹ درج ہے، عمران خان پر 3نومبر کو وزیرآباد میں حملہ کیا گیا تھا۔یاد رہے کہ ویڈیو بیان لیک ہونے پر ایس ایچ او کے خلاف انکوائری شروع کر دی گئی تھی۔
