لاہور(ای پی آئی ) لاہور ہائیکورٹ کے سخت احکامات کے بعد ٹریفک پولیس کی جانب سے پنجاب بھر میں بغیر لائسنس ڈرائیورز کے خلاف سخت کارروائیوں کے بعد بڑی تعداد میں لوگوں نے لائسنس کے حصول کے لئے دفاتر کا رخ کیا جس پر ٹریفک پولیس پنجاب نے بھی لائسنسز کے اجراء میںبرق رفتاری کا مظاہرہ کرتے ہوئے ایک ہی دن میں 74 ہزار سے زائد لائسنس جاری کر کے تاریخ رقم کر دی۔
اس حوالے سے ایڈیشنل آئی جی ٹریفک مرزا فاران بیگ نے ٹریفک ہیڈ کوارٹرز میں مانیٹرنگ سینٹر قائم کردیا، جس کے بعد ڈرائیونگ لائسنس اور چالان کی کارکردگی کا جائزہ لمحہ بہ لمحہ حاصل کیا جارہا ہے ۔گزشتہ روز ٹریفک پولیس نے پنجاب بھر میں 74000 سے زائد ڈرائیونگ لرنر پرمٹ جاری کئے۔ پنجاب کے تمام اضلاع میں سب سے زیادہ لاہور میں 24000 سے زائد لائسنس جاری کیے گئے۔
ایڈیشنل آئی جی ٹریفک مرزا فاران بیگ نے کہا کہ پنجاب کے دوسرے اضلاع بھی بہت محنت سے کام کر رہے ہیں ۔ کم عمر ڈرائیورز کے خلاف کریک ڈاؤن کے بعد ڈرائیونگ سینٹرز میں بہت رش ہے ۔
لاہور میں جاری کریک ڈاؤن کے باعث چھٹی کے روز بھی ڈرائیونگ لائسنس کے حصول کیلئے شہریوں نے بڑی تعداد میں دفاتر کا رخ کرلیا۔ٹریفک پولیس نے ماہ نومبر میں 02 لاکھ 80 ہزار 518 نئے لرنرپرمٹ جاری کئے۔ 82 ہزار سے زائد شہریوں نے اپنے لرنر پرمٹ کی تجدید کروائی۔ 19 ہزار 761 شہریوں نے نئے لائسنس جبکہ 18 ہزار 312 نے لائسنس کی تجدید کروائی۔ 1623 انٹرنیشنل لائسنس، 01 ہزار 817 ڈوپلیکٹ لائسنس جاری کئے گئے۔
