لاہور (ای پی آئی )مسلم لیگ (ن) پنجاب کے صدر اور سابق وفاقی وزیر داخلہ رانا ثناء اللہ نےلاہور میں میڈیا سے گفتگو کرتے ہوئے کہا ہے کہ سابق چیئرمین پی ٹی آئی روزانہ جھوٹ بولتے ہیں، پہلے کہا امریکا نے سازش کرکے حکومت گرائی پھر کہتا جنرل باجوہ نے سازش کی اب کہہ رہا ہے میرے خلاف لندن پلان کے بعد 9 مئی ہوا تھا، اگر 9 مئی کی سازش ہے تو عمران خان نے ہی خود اس سازش کو تیار کیا تھا۔
انھوں نے کہا کہ سب کی بات سنی گئی، ن لیگ کے ورکرز اور رہنماؤں کا شکر گزار ہوں، ایسے ایسے لوگ تھے جو 35 اور 40 سال سے ن لیگ سے وابستہ ہیں، 122 لوگوں کا انٹرویو کیا ہے، بورڈ نے ابتدائی ڈسکشن کرلی ہے۔ خیبرپختونخوا ڈویژن سے متعلق پارلیمانی بورڈ انٹرویو کرے گا، بدھ کو بلوچستان کے امیدواروں کا انٹرویو ہوگا، ن لیگ کے ورکرز اور سپورٹرز پوری طرح پر زور ہیں، جو وعدہ 21 اکتوبر کو نوازشریف نے قوم سے کیا وہ پورا ہوگا، ن لیگ پوری طرح الیکشن کے لیے تیار ہیں۔
رانا ثناء اللہ کا مزید کہنا تھا کہ میثاق معیشت ضروری ہے، کوئی ایک جماعت ملک کو بحران سے نہیں نکال سکتی لیکن میثاق پارلیمان میں منتخب جماعتوں سے ہوگا، جے یو آئی سے انتخابی اتحاد زیرغور نہیں، سیٹ ایڈجسٹمنٹ کے لیے تیار ہیں، فضل الرحمان کے ساتھ الیکشن اتحاد کا حتمی فیصلہ نہیں ہوا، نوازشریف چاروں صوبوں کا دورہ کریں گے، پورے پاکستان جائیں گے۔
انہوں نے یہ بھی کہا کہ سیٹ ایڈجسٹمنٹ پر سیاسی جماعتوں سے بات چیت ہوسکتی ہے، نوجوان یا عمر درازی پر ٹکٹ کا فیصلہ نہیں ہوتا، ٹکٹ کا فیصلہ اس بات پر ہوتا ہے کہ پارٹی کو کون سیٹ نکال کردے گا، یہ فیصلےعمر کی بنیاد پر نہیں ہوتے، عمر کی حد کم از کم 25 سال ہونی چاہیئے، باقی جب تک ہاتھ پاؤں سلامت ہیں الیکشن لڑاجاسکتا ہے۔
رانا ثناء اللہ نے کہا کہ الیکشن کی تاریخ کسی گورنر، چیف کمشنر یا کسی اور نے نہیں دی، الیکشن کی تاریخ سپریم کورٹ آف پاکستان نے دی ہے، 8 فروری کو پاکستان میں عام انتخابات ہوں گے۔
سابق وزیرداخلہ نے سابق وزیر اعظم عمران خان کے بیان پر ر دعمل دیتے ہوئے کہا کہ سائفر کیس میں جنرل ( ر ) باجوہ کو بلانے یا نہ بلانے کا فیصلہ عدالت کرے گی، سابق چیئرمین پی ٹی آئی جھوٹا اور مکار آدمی ہے، انہوں نے کیا نہیں کہا امریکا نے سازش کرکے حکومت گرائی گئی، اس کے بعد کہا گیا امریکا نے نہیں گرائی باجوہ نے میرے خلاف سازش کی، اب کہہ رہا ہے میرے خلاف لندن پلان بنا اور 9مئی ہوا۔
انھوں نے کہا کہ عمران خان 9 مئی سے پہلے جب لوگوں کو کہہ رہا تھا مجھے گرفتار کیا گیا تو فلاں فلاں جگہ پر احتجاج کیا جائے، یہ لندن میں بیٹھ کر تمہیں کوئی مجبور کر رہا تھا یہ تقریر کرو ، کس نے کہا تھا لوگوں کو نوجوانوں کو گمراہ کرو، کس نے کہا تھا نوجوانوں کے ذہن کو خراب کرو، گرفتاری نہ دینے کا فیصلہ امریکا یا نوازشریف کے کہنے پر کیا تھا؟۔ جناح ہاؤس میں جنہوں نے آگ لگائی، تمہارا بھانجا جو چھڑی پر وردی گھما رہا تھا، کیا وہ ہمارا رشتہ دار ہے؟، اسے کس نے کہا تھا ، اس سے پوچھو پھر پتہ چلے تمہارے خلاف سازش ہوئی تھی، خود تم نے اپنی رعونیت ، تکبر اور غرورمیں یہ حرکت کی، اس کا خمیازہ تمہیں بھگتنا پڑے گا، اگر یہ سازش ہے تو تم نے ہی اپنے خلاف کی ہے۔
رانا ثنا اللہ نے کہاکہ دانیال عزیز اس حلقے سےاویس قاسم اور احسن اقبال اپنے بیٹے احمد اقبال کو میدان میں اتارنا چاہتے ہیں،ٹکٹ کا فیصلہ عمر کی بنیاد پر نہیں جیتنے کے امکانات پر ہوتا ہے،مسئلہ مہنگائی تھا تو دانیال عزیز 16ماہ کی حکومت کے دوران کیوں خاموش رہے؟
