راولپنڈی (ای پی آئی ) انسدادِ دہشت گردی کی عدالت میں 9 مئی کے مقدمات میں پیشی کے بعد میڈیا سے گفتگو کرتے ہوئے سابق وفاقی وزیر داخلہ اور سربراہ عوامی مسلم لیگ شیخ رشید کا کہنا تھا کہ 9 مئی کے مقدمات سے میرا کوئی تعلق نہیں۔اداروں کا ہمیشہ احترام کیا ہے، میں 8 مئی سے 16 مئی تک یہاں نہیں تھا،
انھوں نے کہا کہ اللّٰہ بہتر کرے گا، زندہ رہا تو الیکشن ضرور لڑوں گا۔ این اے 56 اور 57 سے الیکشن ہر صورت لڑوں گا اور قلم دوات کے نشان پر لڑوں گا۔
اس سے قبل 9 مئی کے مقدمات میں سماعت کے موقع پر شیخ رشید احمد اور ان کے بھتیجے شیخ راشد شفیق وکیل سردار عبدالرازق خان کے ہمراہ عدالت میں پیش ہوئے
کیس کی سماعت انسدادِ دہشت گردی کی عدالت کے جج ملک اعجاز آصف نے کی دوران سماعت سرکاری وکلاء نے حتمی دلائل کے لیے 4 جنوری تک وقت دینے کی استدعا کر دی۔
جس پر عدالت کی جانب سے شیخ رشید احمد اور شیخ راشد شفیق کی عبوری ضمانتوں میں 4 جنوری توسیع کر تے ہوئے سماعت ملتوی کر دی
