لاہور (ای پی آئی ) توہین الیکشن کمیشن کیس میں الیکشن کمیشن کی جانب سے جیل ٹرائل کے فیصلے کے خلاف سابق چیئرمین پاکستان تحریک انصاف عمران خان نے لاہور ہائیکورٹ سے رجوع کر لیا ۔جیل ٹرائل روکنے کی استدعا
تفصیل کے مطابق بانی پی ٹی آئی کی جانب سے لاہور ہائیکورٹ میں وکلاء سلمان اکرم راجا اور بیرسٹر سمیر کھوسہ کی وساطت سے درخواست دائر کی گئی ہے جس میں وفاقی حکومت، الیکشن کمیشن اور اڈیالہ جیل کے سپرنٹنڈنٹ کو فریق بنایا گیا ہے۔
دائر درخواست میں مؤقف اپنایا گیا ہے کہ الیکشن کمیشن نے اس کیس میں جیل ٹرائل کا فیصلہ کیا ہے جو غیر قانونی ہے، جیل میں خفیہ ٹرائل آئین کے آرٹیکل 4 کی خلاف ورزی ہے، الیکشن کمیشن نے 13 دسمبر کی تاریخ جیل میں فردِ جرم کی کارروائی کیلئے مقرر کر رکھی ہے۔
دائر درخواست میں مزید کہا گیا ہے کہ الیکشن کمیشن نے غیر قانونی طور پر توہین الیکشن کمیشن کی کارروائی شروع کر رکھی ہے، الیکشن کمیشن کے پاس اس کارروائی کا اختیار نہیں ہے۔
درخواست میں استدعا کی گئی کہ لاہور ہائیکورٹ الیکشن کمیشن کا جیل ٹرائل کرنے کا فیصلہ کالعدم قرار دے، عدالت اوپن اور فری اینڈ فیئر ٹرائل کا حکم جاری کرے۔ حتمی فیصلے تک خفیہ ٹرائل کے ذریعے فرد جرم کی کارروائی روکنے کی بھی استدعا کی گئی ہے
