لاہور (ای پی آئی ) الیکشن کمیشن کی جانب سے الیکشن 2024 میں بیوروکریسی کی خدمات حاصل کرنے کے خلاف دائر درخواستوں پر لاہور ہائیکورٹ نے تحریری فیصلہ جاری کر دیا ہے ۔
لاہور ہائیکورٹ کےجج جسٹس باقر نجفی نے پانچ صفحات پر مشتمل محفوظ تحریری فیصلہ جاری کیا ہے ۔
عدالت کی جانب سے جاری فیصلے میں درخواستوں پر لارجر بینچ تشکیل دینے کی سفارش کرتے ہوئے کہا گیا ہے کہ انتخابات پر قوم کے اربوں روپے خرچ ہوتے ہیں، اگر بڑی سیاسی جماعتیں الیکشن نتائج تسلیم نہ کریں تو غریب قوم کے اربوں روپے ضائع ہوں گے
عدالت کی جانب سے مزید کہا گیا ہے کہ الیکشن کمیشن کو صاف اور شفاف انتخابات کا انعقاد یقینی بنانا ہے، شفاف انتخابات کو حقیقت میں بدلنے کےلیے امیدواروں اور ووٹرز کو یکساں مواقع فراہم کرنے ہیں۔ موجود صورتحال میں جنرل الیکشن سے مطلوبہ نتائج حاصل نہیں ہوسکتے، جس سے جمہوریت کا مستقبل کمزور ہوسکتا ہے۔
عدالت نے عام انتخابات ایگزیکٹو سے کروانے کا الیکشن کمیشن کا نوٹیفکیشن معطل کرتے ہوئے فائل چیف جسٹس کو ارسال کردی ہے