اسلام آباد (ای پی آئی )پاکستان ٹیلی ویژن ہیڈکوارٹرز کی جانب سے تمام ریگولر، کنٹریکٹ اور پروفیشنل ملازمین کو اپنی ڈگریاں اعلیٰ تعلیمی کمیشن (ایچ ای سی) سے تصدیق کرانے کے لیے حتمی نوٹس جاری کر دیا گیا۔
پی ٹی وی انتظامیہ کا کہنا ہے کہ جن ملازمین نے 31 جنوری 2025 کی مقررہ ڈیڈلائن تک ہدایات پر عمل نہیں کیا، انہیں ایک ہفتے کی مہلت دی جا رہی ہے کہ وہ ہائر ایجوکیشن کمیشن (ایچ ای سی) سے تصدیق شدہ اپنی ڈگریوں کی نقول متعلقہ شعبے میں جمع کرائیں۔
انتظامیہکی جانب سے واضح کیا گیا ہے کہ مقررہ مدت میں ڈگری ویریفیکیشن مکمل نہ کرنے والے ملازمین کے خلاف سخت تادیبی کارروائی کی جائے گی، جس میں معطلی، تنزلی اور حتیٰ کہ ملازمت کے خاتمے جیسے اقدامات بھی شامل ہو سکتے ہیں۔
ڈائریکٹر ایڈمنسٹریشن نے تمام ملازمین کو فوری طور پر ڈگری تصدیق کا عمل مکمل کرنے کی ہدایت جاری کر دی ہے، جبکہ پی ٹی وی کے تمام مراکز کو تحریری ہدایت نامہ بھی بھیج دیا گیا ہے اور اس پر عملدرآمد کی رپورٹ بھی طلب کر لی گئی ہے۔
پی ٹی وی انتظامیہ نے دوٹوک موقف اختیار کرتے ہوئے کہا ہے کہ ڈگری تصدیق میں کسی قسم کی کوتاہی یا تاخیر برداشت نہیں کی جائے گی۔ قانون کے مطابق سرکاری ادارے میں ملازمت کے لیے مستند اور تصدیق شدہ تعلیمی اسناد بنیادی ضرورت ہیں، اور اس پالیسی پر مکمل عملدرآمد ادارے کی ساکھ اور شفافیت کے لیے ناگزیر ہے۔
