راولپنڈی (ای پی آئی )پاکستان اور جنوبی افریقہ کے درمیان راولپنڈی اسٹیڈیم میں کھیلے جانے والے دوسرے ٹیسٹ میچ کے دوسرے روز پاکستان کی پوری ٹیم 333 رنز بنا کر آؤٹ ہو گئی ۔جنوبی افریقی اسپنر کیشو مہاراج نے 7 شکار کئے
پاکستانی ٹیم نے دوسرے روز 259 رنز 5 کھلاڑی آؤٹ پر کھیل کا آغاز کیا تو کچھ دیر مزاحمت کے بعد سلمان آغا 45 رنز بناکر مہاراج کی گیند پر ایل بی ڈبلیو آؤٹ ہوگئے۔سعود شکیل بھی 66 رنز پر مہاراج کا شکار بنے جبکہ شاہین شاہ آفریدی کو بھی مہاراج نے ہی صفر پر بولڈ کردیا۔
بعد ازاں ایک ہی اوور میں ساجد خان (5) اور آصف آفریدی (4) کو آؤٹ کرکے وہ پاکستان کے خلاف 7 وکٹیں حاصل کرنے والے دوسرے جنوبی افریقی بولر بن گئے۔پاکستان ٹیم اپنے گزشتہ روز کے اسکور میں صرف 74 رنز کا ہی اضافہ کرسکی۔
گزشتہ روز پاکستان نے 5 وکٹوں کے نقصان پر 259 رنز بنائے تھے۔ کپتان شان مسعود 87 اور عبداللہ شفیق 57 رنز بناکر نمایاں رہے تھے۔محمد رضوان 19، امام الحق 17 اور بابر اعظم 16 رنز بناکر آؤٹ ہوئے تھے۔
