اسلام آباد(ای پی آئی) اسلام آباد کے علاقے میں واقع سہالہ کہوٹہ روڈ بارشوں کے باعث گزشتہ تین روز سے بند ہونے کے خلاف آل پاکستان آئل ٹینکرز کنٹریکٹرز ایسوسی ایشن نے ہڑتال کردی، سہالہ آئل ڈپو سے جڑواں شہروں سمیت ملک کے بیشتر علاقوں کو پٹرولیم مصنوعات کی سپلائی معطل رہے گی۔
ایسوسی ایشن کے جنرل سیکریٹری نعمان بٹ کا کہنا تھا کہ سہالہ روڈ گزشتہ کئی سال سے ٹوٹ پھوٹ کا شکار ہے، سہالہ آئل ڈپو سے سپلائی کے لیے نکلنے والے درجنوں آئل ٹینکرز حادثے کا شکار ہوچکے ہیں، حالیہ بارشوں سے اہم شاہراہ پر آئیل ٹینکرز چلانا مشکل ہوچکا ہے، اسلام آباد انتظامیہ کو متعدد مرتبہ آگاہ کیا لیکن داد رسی نہیں ہوئی۔
انہوں نے کہا کہ آئل ٹینکرز ایسوسی ایشن نے فیصلہ کیا ہے کہ روڈ کی مکمل مرمت تک ہڑتال رہے گی، ہڑتال کی وجہ سے راولپنڈی، اسلام آباد، گلگت، کشمیر اور اسلام آباد انٹرنیشنل ائیرپورٹ کے لیے پٹرول، ڈیزل اور دیگر مصنوعات کی سپلائی معطل ہوچکی ہے جس سے پٹرول کی قلت کا خدشہ ہے۔