اسلام آباد (ای پی آئی) پاکستان سے جلا وطن ہوکرامریکہ میں مقیم صحافی احمد نورانی کے 2 بھائیوں کی بازیابی کے لیے اسلام آبادہائیکورٹ میں درخواست دائر کردی گئی ہے .
صحافی احمد نورانی کی والدہ امینہ بشیر نے لاپتہ بیٹوں کی بازیابی کے لیے ہائیکورٹ سے رجوع کرتے ہوئے آئینی درخواست دائر کی ہے جس میں سیکرٹری دفاع ، سیکرٹری داخلہ ، آئی جی اسلام آباد اور ایس ایچ او تھانہ نون کو فریق بنایا گیا ہے .
ایڈوکیٹ ایمان مزاری اور ہادی علی چٹھہ کے ذریعے دائردرخواست میں موقف اختیار کیا گیا ہے کہ انکے دوبیٹوں سیف الرحمن حیدر اور محمد علی کو اسلام آباد کے سیکٹر آئی 14 میں موجودگھر سے آج رات ایک بجکر 5 منٹ پر سادہ لباس لوگ اٹھا کر لے گئے .
درخواست میں کہا گیا ہے کہ اغوا کے مقدمہ اندراج کے لیے درخواست تھانہ نون میں دائر کی گئی لیکن ابھی تک
مقدمہ بھی درج نہیں کیا گیا نہ ہی لاپتہ کئے جانے والوں کے حوالے سے ابھی کچھ معلوم ہے ،
درخواست کے متن میں کہا گیا ہے کہ مغویوں کا کوئی کرمنل ریکارڈ نہیں اس کے باوجود غیر قانونی طور پراغوا کر لیا گیا ، درخواست میں استدعا کی گئی ہے کہ لاپتہ بھائیوں کو بازیاب کرا کے عدالت پیش کرنے کا حکم دیا جائے اور
مقدمہ درج کرکے غیر قانونی اغوا کرنے والے کے خلاف کاروائی کی جائے .
درخواست میں یہ استدعابھی کی گئی ہے کہ لاپتہ بھائیوں کے خلاف کوئی مقدمہ ہے تو وہ بھی سامنے لانے کا حکم دیا جائے .
