لاہور(ای پی آئی ) انسداد دہشت گردی عدالت لاہور میں بانی پی ٹی آئی عمران خان کی بہنوں علیمہ خان اور عظمیٰ خان کے خلاف 5 اکتوبر احتجاج کیس کی سماعت ،عدالت نے ایک روزہ حاضری سے استثنیٰ کی درخواست منظور کرتے ہوئےعبوری ضمانتوں میں توسیع کردی ۔
تفصیل کے مطابق لاہور کی انسداد دہشت گردی عدالت میں علیمہ خان، عظمی خان اور سلمان اکرم راجہ کی عبوری ضمانتوں کی درخواست پر سماعت ہوئی۔عدالت نے علیمہ خان اور عظمیٰ خان کی ایک روزہ حاضری معافی کی درخواست منظور کرتے ہوئے عبوری ضمانتوں میں 17 مئی تک توسیع کردی۔
دوران سماعت وکیل نے موقف اختیار کیا کہ علیمہ خان اور عظمیٰ خان کی اڈیالہ جیل میں بانی پی ٹی آئی سے ملاقات ہے، عدالت ایک روزہ حاضری معافی کی درخواست منظور کرے۔
سلمان اکرم راجہ، ندیم بارا، ضمیر جھیڈو سمیت دیگر نے عدالت پیش میں ہوکر اپنی حاضری مکمل کروائی۔ملزمان کیخلاف تھانہ لاری اڈا، مستی گیٹ پولیس نے مقدمات درج کر رکھے ہیں۔اے ٹی سی عدالت کے جج کے رخصت پر ہونے کے باعث کارروائی ملتوی کردی گئی۔
