راولپنڈی(ای پی آئی ) انسداد دہشتگردی عدالت راولپنڈی میں 26 نومبر احتجاج کیس کی سماعت ،عدالت نے عدم پیروی پر سینئر صحافی سمیع ابراہیم سمیت پی ٹی آئی رہنماؤں راجا بشارت، صنم جاوید، مشعال یوسفزئی، نادیہ خٹک و دیگر 16 رہنماؤں و کارکنان کی ضمانت خارج کر دی۔
تفصیل کے مطابق انسداد دہشتگردی عدالت کے جج امجد علی شاہ نے پاکستان تحریک انصاف کے رہنماؤں اور کارکنان کی درخواست ضمانتوں پر سماعت کی ۔ دوران سماعت پراسیکیوٹر ظہیر شاہ نے دلائل دیتے ہوئے کہا کہ ملزمان چار ماہ سے عدالتی رعایت کا ناجائز فائدہ اٹھا رہے ہیں اور مسلسل عدالت سے غیر حاضر ہیں۔ملزمان تفتیشی عمل میں جان بوجھ کر رکاوٹ ڈال رہے ہیں اور عبوری ضمانت کی رعایت کا بھی ملزمان نے ناجائز استعمال کیا۔
پراسیکیوٹر نے سپریم کورٹ کے فیصلوں کے ریفرنس بھی عدالت میں پیش کیے جس پر عدالت نے پی ٹی آئی کے 16 رہنماؤں و کارکنان کی ضمانت عدم پیروری پر خارج کردی۔
ضمانت خارج ہونے والوں میں سابق صوبائی راجہ بشارت، صنم جاوید، مشعال یوسفزئی، سیمابیہ طاہر، تیمور مسعود، فہد مسعود، سعد علی خان، راجہ ناصر محفوظ، جاوید کوثر، شہباز احمد، نادیہ خٹک، عمر تنویر بٹ، بابر لودھی، نثار خان، عبدالوحید
جبکہ صحافی سمیع ابراہیم کے نام شامل ہیں۔واضح رہے کہ ملزمان کیخلاف راولپنڈی اور اٹک کے مختلف تھانوں میں مقدمات درج ہیں۔
