کراچی (ای پی آئی ) (فیڈرل بورڈ آف ریونیو )ایف بی آر نے انسانی اسمگلنگ میں ملوث کسٹم انفورسمنٹ حیدرآباد کے انسپکٹر مومن شاہ کو ملازمت سے برطرف کر دیا،۔
ترجمان اایف بی آر کے مطابق آمدن سے زائد اثاثے بنانے ،اسمگلنگ میں ملوث ہونے ،نان کسٹم پیڈ گاڑیاں زاتی مقاصد میں استعمال کرنے کے اور ایف آئی اے کے چھاپے کے دوران ڈیڑھ ارب روپے مالیت کی جیولری گھر سے ضبط ہونے کے الزام میں کسٹم انفورسمنٹ حیدرآباد کے گریڈ 16 کے افسر انسپکٹر مومن شاہ ملازمت سے برخاست کرنے کی سزا سنائی گئی ۔
ایف بی آر حکام نے سزا کی زد میں آنے والے انسپکٹر کو سنوائی کا موقع فراہم کرنے کے بعد فیصلہ جاری کیا ہے۔ایف بی آر کے ریونیو ڈیویژن کے جاری حکم نامے کے مطابق ایف آئی اے کرائم سرکل حیدرآباد کے دو مقدمات میں انسپکٹر مومن شاہ کو معطل کر کے گریڈ 20 کی افسر مونا محفوظ کو انکوائری افسر مقرر کیا گیا جس پر انکوائری افسر نے اپنی رپورٹ میں ایف بی آر حکام کو تحریری آگاہ کیا کہ انسپکٹر مومن شاہ کے خلاف ایف آئی اے کے مقدمات میں ٹھوس شواہد موجود ہیں جبکہ ملزم کے موبائل ڈیٹا سے بھی اسمگلروں اور جرائم پیشہ افراد سے رابطہ ثابت ہوئے ہیں اور اسی بنیاد پر انکوائری افسر نے ایف بی آر کو تحریری طور پر انسپکٹر مومن شاہ کو ملازمت سے فوری برطرف کرنے کی سخت سزا تجویز کی ۔
تاہم انکوائری افسر کی رپورٹ کے بعد انسپکٹر مومن شاہ نے الزامات کو مسترد کرتے ہوئے اپنے خلاف لگائے گئے الزامات پر ذاتی سنوائی کی درخواست کی جسے منظور کرتے ہوئے ایف بی آر نے ڈپٹی کلکٹر کسٹم شہزادی حریم فاطمہ کے روبرو پیش ہونے کی ہدایت کی جس کے بعد زوم پر انسپکٹر مومن شاہ نے سماعت کے دوران اپنے اوپر لگائے الزامات کو مسترد کرتے ہوئے بتایا کہ ایف آئی اے کا ایک کیس عدالت میں ختم ہوگیا ہے اور اس کیس میں عدالت نے انہیں بری کیا ہے جبکہ دیگر کیسز پر تاحال عدالتی کارروائی جاری ہے جس کا فیصلہ آنا باقی ہے ۔
پرسنل ہئیرنگ کے بعد ڈپٹی کلکٹر کسٹم نے ایف بی آر حکام کو تحریری طور پر بتایا کہ انسپکٹر مومن شاہ نے اپنے اوپر لگائے الزامات کا زبانی دفاع کیا ہے تاہم تحریری طور پر کوئی شواہد پیش نہیں کرسکے ہیں جس پر ڈپٹی کلکٹر نے انکوائری افسر کی رپورٹ کو برقرار رکھتے ہوئے فیصلہ سنایا ہے کہ انسپکٹر مومن شاہ کو فوری طور پر ملازمت سے برطرف کیا جائے ان دونوں رپورٹس کے بعد ایف بی آر نے اپنا فیصلہ سنا دیا ہے اور انسپکٹر مومن شاہ کو ملازمت سے برطرف کردیا ہے۔
