اسلام آباد(ای پی آئی) خاتون اول آصفہ بھٹوزرداری نے کہاہے کہ چھاتی کے سرطان کی روک تھام کے لیے مشترکہ کوششوں کی ضرورت ہے اور حکومتی اداروں، طبی ماہرین، میڈیا اور کمیونٹیز کو مشترکہ جدوجہد کی ضرورت ہے۔
پنک ربن پاکستان کے سی ای او عمر آفتاب نے خاتونِ اوّل آصفہ بھٹو زرداری سے ایوانِ صدر میں ملاقات کی۔ اس موقع پرآصفہ بھٹو زرداری نے کہا کہ پاکستان میں ہر نو میں سے ایک خاتون چھاتی کے سرطان کے خطرے سے دوچار ہے ، تاخیر سے تشخیص ہر سال ہزاروں خواتین کی جان لے لیتی ہے اور بروقت تشخیص کی صورت میں شفا یابی کی شرح نوے فیصد سے زائد ہے ۔
خاتون اول نے کہا کہ ہر خاتون کو بروقت اسکریننگ، درست تشخیص اور معیاری علاج کی سہولت ملنی چاہیے اور خواتین کی صحت کو قومی ترجیح بنانا چاہیے ۔ انہوں نے کہا کہ دیہی علاقوں میں چھاتی کے سرطان کے علاج اور تشخیص کی سہولیات بڑھانے کی ضرورت ہے۔
آصفہ بھٹو زرداری نے کہا کہ موبائل میموگرافی یونٹس اور کمیونٹی آوٹ ریچ پروگرام کے فروغ کی ضرورت ہے ۔ خاتونِ اوّل نے کہا کہ میڈیا، تعلیمی شعبے اور مذہبی رہنما سے ملک گیر آگاہی مہم میں کردار ادا کریں۔
