اسلام آباد(ای پی آئی) اسپیکر قومی اسمبلی سردار ایاز صادق نے حریت رہنما سید علی گیلانی کی چوتھی برسی پر خراج عقیدت پیش کرتے ہوئے کہا ہے کہ
سید علی گیلانی نے اپنی پوری زندگی حقِ خودارادیت کی جدو جہد کیلئے وقف کردی.
اسپیکر سردار ایاز صادق نے کہا ہے کہ کشمیری عوام کی قربانی اور ثابت قدمی گیلانی صاحب کی جدوجہد کا تسلسل ہے،بھارتی ظلم و جبر سید گیلانی کے عزم کو متزلزل نہ کر سکا،سید علی گیلانی کا نام ہمیشہ کشمیری عوام کی تحریکِ آزادی کے ساتھ جڑا رہے گا.
اسپیکر سردار ایاز صادق نے کہا کہ برسوں کی قید و بند اور نظر بندی بھی سید علی گیلانی کے عزم کو کمزور نہ کر سکی ان کا کردار کشمیری عوام کی آزادی کی تحریک کیلئے مشعلِ راہ ہے اور سید علی گیلانی کی جدوجہد آزادی نسلوں تک رہنمائی فراہم کرتی رہے گی.
انہوں نے کہا کہ سید علی گیلانی کا نعرہ ’’ہم پاکستانی ہیں، پاکستان ہمارا ہے‘‘ آج بھی کشمیری عوام کے دلوں کی آواز ہے، سید علی گیلانی کی جدوجہدِ آزادی کشمیری عوام کے دلوں میں ہمیشہ زندہ رہے گی. سید علی گیلانی کی جدوجہد ہمیں عزم، استقامت اور آزادی کی راہ پر قائم رہنے کا درس دیتی ہے،
اسپیکر سردار ایاز صادق کا کہنا تھا کہ سید علی گیلانی مظلوم کشمیری عوام کے لیے امید اور مزاحمت کی علامت ہیں، پارلیمنٹ حق خودارادیت کی تحریک میں کشمیری عوام کے ساتھ کھڑی ہے، پاکستان کشمیری عوام کے حقِ خودارادیت کیلئے ہر فورم پر آواز بلند کرتا رہے گا.
