لاہور(ای پی آئی)سیشن کورٹ لاہور میں مسجد کے قاری عثمان کے قتل کیس کی سماعت ،عدالت نے جرم ثابت ہونے پر مجرم غلام محمد کو سزائے موت 10 لاکھ روپے جرمانے کی سزا سنا دی ۔
تفصیل کے مطابق ایڈیشنل سیشن جج ریاض احمد نے کیس کی سماعت کی پراسیکیوشن کے مطابق ہڈیارہ پولیس نے مجرم غلام محمد کے خلاف 2020 میں قتل کا مقدمہ درج کیا تھا۔ سرکاری وکیل حبیب الرحمان بھٹی نے عدالت میں گواہوں کو پیش کیا۔
پراسیکیوشن نے بتایا کہ قاری عثمان مغرب کی اذان کے لیے گھر سے نکلے تو مجرم نے دروازے پر فائرنگ کرکے انہیں قتل کردیا۔ گواہ کے بیان کے مطابق واقعہ لین دین کے تنازع پر پیش آیا۔عدالت نے قرار دیا کہ پراسیکیوشن اپنا کیس ثابت کرنے میں کامیاب رہی، اس لیے مجرم غلام محمد ثبوتوں کی روشنی میں سزا کا مستحق ہے۔
