راولپنڈی(ای پی آئی)انسداد دہشت گردی عدالت راولپنڈی میں 26 نومبر احتجاج کیس کی سماعت، بانی پی ٹی آئی کی بہن علیمہ خان کے قابلِ ضمانت وارنٹِ گرفتاری جاری۔
تفصیل کے مطابق انسداد دہشت گردی عدالت میں 26 نومبر احتجاج کیس میںبانی پی ٹی آئی بہن علیمہ خان سمیت 10 ملزمان کے خلاف تھانہ صادق آباد میں درج مقدمے کی سماعت ہوئی، دورانسماعت علیمہ خان کے علاوہ باقی ملزمان عدالت میں پیش ہوئے جبکہ علیمہ خان کی جانب سے ان کے وکیل فیصل ملک اور حسنین سنبل نے حاضری سے استثنیٰ کی درخواست دائر کی جسے عدالت نے خارج کردیا۔
عدالت میں پراسیکیوٹر ظہیر شاہ نے کہا کہ وکیل فیصل ملک اور حسنین سنبل کا علیمہ خان کے کیس میں وکالت نامہ ہی جمع نہیں، دونوں وکلاء علیمہ خان کی طرف سے حاضری سے استثنیٰ کی درخواست نہیں دے سکتے۔بعدازاں عدالت نے علیمہ خان کے قابلِ ضمانت وارنٹ گرفتاری جاری کر کے سماعت 11 اکتوبر تک ملتوی کردی۔
