راولپنڈی (ای پی آئی ) انسداد دہشت گردی عدالت راولپنڈی میں 26 نومبر کے احتجاج پر درج مقدمات کی سماعت ،بانی پی ٹی آئی ہمشیرہ علیمہ خان پیش نہ ہوئیں عدالت نے مسلسل عدم پیشی پر تیسری بار ناقابل ضمانت وارنٹ گرفتاری جاری کر دیے۔
تفصیل کے مطابق انسداد دہشت گردی عدالت راولپنڈی کے جج امجد علی شاہ نے بانی پی ٹی آئی کی بہن علیمہ خان سمیت 11 ملزمان کے خلاف 26 نومبر کے احتجاج پر درج مقدمات کی سماعت کی۔دوران سماعت علیمہ خان کے علاوہ مقدمے میں نامزد 10 ملزمان عدالت پیش ہوئے جبکہ استغاثہ کے 5 گواہان بھی مال مقدمہ سمیت عدالت پیش ہوئے۔
عدالت نے علیمہ خان کی عدم حاضری پر تیسری مرتبہ ناقابل ضمانت وارنٹ گرفتاری جاری کر دیے۔عدالت نے علیمہ خان کے ضامن عمر شریف کے بھی ناقابل ضمانت وارنٹ گرفتاری جاری کرتے ہوئے پولیس کو حکم دیا کہ علیمہ خان کو گرفتار کر کے 22 اکتوبر کو پیش کریں۔
انسداد دہشت گردی عدالت نے علیمہ خان کے ضامن کی جائیداد کی دستاویزات کی تصدیق کے لیے ڈی سی راولپنڈی کو ہدایات جاری کر دیں۔
