لاہور(ای پی آئی ) لاہور ہائیکورٹ میں 2 سال قبل بانی پی ٹی آئی کی جانب سے درج مقدمات کی تفصیل اور ان کو یکجا کرنے کی درخواست پر سماعت ۔پنجاب حکومت کے وکیل نے بانی پی ٹی آئی کے خلاد درج مقدمات کی تعداد بتا دی ۔عدالت نے درخواست عدم پیروی کی بنا پر خارج کر دی
تفصیل کے مطابق لاہور ہائیکورٹ میں بانی چیئرمین پی ٹی آئی عمران خان کی اپنے خلاف درج تمام مقدمات کو یکجا کرنے کی درخواست پر سماعت ہوئی،دوران سماعت بانی پی ٹی آئی عمران خان کی جانب سے کوئی وکیل عدالت میں پیش نہیں ہوا۔
عدالت نے پنجاب حکومت کے وکیل سے استفسار کیا کہ درخواست گزار کے خلاف کتنے مقدمات درج ہیں، جس پر وکیل نے بتایا کہ درخواست گزار پر 107 مقدمات درج ہیں۔چیف جسٹس عالیہ نیلم کے روبرو ہونے والی سماعت میں عمران خان کی جانب سے کوئی وکیل پیش نہیں ہوا، جس پر عدالت نے درخواست عدم پیروی کی بنیاد پر خارج کردی ۔
واضح رہے کہ 2023ء میں بانی پی ٹی آئی کی جانب سے یہ درخواست دائر کی گئی تھی ، جس میں مؤقف اختیار کیا گیا تھا کہ پنجاب کے تمام شہروں میں مقدمات درج ہیں ، انہیں یکجا کیا جائے۔
