پشاور(ای پی آئی)پاکستان تحریک انصاف کے رہنما وسابق وفاقی وزراء پرویز خٹک اور شہریار آفریدی نے 50،50ہزار روپے جرمانہ سرکاری خزانے میں جمع کرا دیا۔
الیکشن کمیشن خیبر پختونخوا کے مطابق پرویز خٹک این اے25نوشہرہ سے ضمنی انتخابات میں حصہ لے رہے ہیں، ان پر بلدیاتی انتخابات میں لوئر دیر میں ضابطہ اخلاق کی خلاف ورزی کا الزام ہے۔
الیکشن کمیشن کے پی نے کہاکہ پرویز خٹک نے وفاقی وزیر کی حیثیت سے جلسے میں شرکت کی تھی جس پر ڈسٹرکٹ مانیٹرنگ آفیسر نے ان پر50ہزار روپے جرمانہ عائد کیا تھا۔
الیکشن کمیشن خیبر پختونخوا نے کہاکہ پرویز خٹک نے جرمانہ سرکاری خزانے میں جمع نہیں کرایا تھا۔الیکشن کمیشن کی جانب سے آر اوز کو ہدایت کی گئی تھی کہ ضمنی انتخابات کے ایسے امیدواروں سے سابقہ جرمانے کی وصولی کی جائے۔ادھر سابق وفاقی وزیر شہر یار آفریدی نے بھی 50ہزار روپے جرمانہ قومی خزانے میں جمع کرا کے چالان ریٹرننگ آفیسر کو پیش کر دیا ہے۔
