کراچی (ای پی آئی ) کراچی میں بلدیاتی انتخابات کے اہم مرحلے میئر کراچی کے انتخاب کےلئے ہونے والے الیکشن میں تیسری پوزیشن پر رہنے والی پاکستان تحریک انصاف نے جماعت اسلامی کے امیدوار حافظ نعیم الرحمن کوسپورٹ کرنے کا فیصلہ کیا ہے ۔
اس حوالے ترجمان پی ٹی آئی کا کہنا ہے کہ تحریک انصاف میئرکراچی کے انتخاب میں جماعت اسلامی کے امیدوار کو سپورٹ کریگی۔
اپنے بیان میں ترجمان کا کہنا ہے کہ پیپلزپارٹی میئر کراچی کے انتخابی عمل میں پری پول رگنگ کر رہی ہے، منتخب بلدیاتی نمائند وںکو سندھ پولیس کے ذریعے اغوا کرایا جا رہا ہے۔ترجمان کے مطابق پیپلز پارٹی4بار بلدیاتی انتخاب سے پیچھے بھاگی، اب عجلت میں میئرکا انتخاب کرانا چاہتی ہے، بلدیاتی نمائندگان کی حلف برداری سے پہلے ان کو اغوا کیا جا رہا ہے، پی ٹی آئی اس معاملے پر عدالت سے بھی رجوع کر چکی ہے۔
ترجمان تحریک انصاف کا کہنا ہے کہ میئر کا انتخاب شفاف طریقہ کار سے ہونا چاہیے، پیپلز پارٹی اور ایم کیو ایم نہیں چاہتیں کے عوامی مینڈیٹ قبول کیا جائے۔دوسری جانب پیپلز پارٹی کی قیادت نے میئر کراچی کے عہدے کے لیے مرتضی وہاب کے نام کی منظوری دی ہے۔
خیال رہے کہ کراچی میں بلدیاتی انتخابات میں کل 246میں سے 240نشستوں کے غیر حتمی اورغیرسرکاری نتائج کے مطابق پیپلز پارٹی نے 98، جماعت اسلامی نے87اور تحریک انصاف نے43سیٹں جیتی ہیں جبکہ ن لیگ نے 7، جے یوآئی نے 3،تحریک لبیک اور آزادامیدوار نے ایک ایک سیٹ جیتی ہے۔اس کے علاوہ 6 یونین کمیٹیز کی نشستوں پر نتائج کا معاملہ عدالت میں زیرسماعت ہے ۔
