پشاور(ای پی آئی )پاکستان تحریک انصاف خیبرپختون خوا کے رہنما اور سابق ڈپٹی اسپیکرخیبرپختونخواہ اسمبلی محمود جان کو قتل ،اقدام قتل کی دفعات کے تحت درج مقدمہ میں گرفتار کرلیا گیا۔
تفصیلات کے مطابق پاکستان تحریک انصاف خیبر پختونخوا کے رہنما اور سابق ڈپٹی اسپیکر خیبرپختونخوا اسمبلی محمود جان کا مقامی افراد کے ساتھ جائیداد کا تنازعہ چل رہا ہے ۔ جس کے باعث دونوں گروپوں کے درمیان فائرنگ کے نتیجے میں 3 افراد جاں بحق اور 8 افراد زخمی ہوئے ۔
پولیس نے واقعہ کا مقدمہ درج کرتے ہوئے قتل اور اقدام قتل کے مقدمے میں نامزد پی ٹی آئی کے رہنما اور سابق ڈپٹی اسپیکر صوبائی اسمبلی محمود جان کو گرفتار کر کےجوڈیشل مجسٹریٹ کی عدالت میں پیش کردیا، جہاں عدالت نے ملزم کو ایک روزہ جسمانی ریمانڈ پر پولیس کے حوالے کردیا۔
قبل ازیں پولیس نے عدالت میں مؤقف اختیار کیا کہ ملزم کو تھانہ ریگی کی حدود میں عیسیٰ خیل قوم کے جلوس پر فائرنگ کے الزام میں گرفتار کیا گیا ہے۔ ڈیرہ اسماعیل خان کی مقامی عدالت سے عبوری ضمانت خارج ہونے کے بعد ملزم کو گرفتار کیا گیا۔ملزم سے مزید تفتیش کی ضرورت ہے۔
