کراچی ( ای پی آئی ) امیر جماعت اسلامی کراچی حافظ نعیم الرحمن نے کراچی میں پریس کانفرنس میں میئر کراچی مرتضیٰ وہاب کو تنقید کا نشانہ بناتے ہوئے کہا کہ میئر صاحب برساتی نالوں کی صفائی کریں، صرف فوٹوسیشن نہ کریں،
انھوں نے کہا کہ نالوں میں بارش کے پانی کے نکاس کے راستے بند ہیں، انٹر لنک نالوں کا برا حال ہے، کچرے سے بھرے ہیں،مرتضیٰ وہاب جب ایڈمنسٹریٹر تھے اس وقت بھی نالوں کی صفائی کے نام پر کرپشن ہوئی، نالوں کی صفائی کا کام اب بھی نہیں کیا جا رہا۔ گھوسٹ ملازمین ابھی بھی چل رہے ہیں،
انھوں نے کہا کہ تنخواہیں ٹاؤنز سے جا رہی ہیں مگر کام نہیں ہو رہا، یوسی سطح پر کچرا نہیں اٹھایا جا رہا ، سندھ سولڈ ویسٹ مینجمنٹ کا عملہ گھروں سے کچرا نہیں اٹھا رہا، لوگ پیسے دے کر کچرا اٹھوا رہے ہیں۔ میئر صاحب برساتی نالوں کی صفائی کریں، صرف تصویر سیشن نہ کریں۔
امیرِ جماعت اسلامی کا مزید کہنا تھا کہ پیپلز پارٹی کے ٹاؤنز میں بھی جا کے دیکھیں کہ کتنا کام ہوا ہے، نالوں میں بارش کے پانی کے نکاس کے راستے بند ہیں، انٹر لنک نالوں کا برا حال ہے، کچرے سے بھرے ہیں۔ کچرے کی پیدوار زیادہ ہے اور گاڑیاں کم ہیں، کچرا اٹھانے کا کام ٹھیک طرح سے کیا جائے،
انھوں نے کہا کہ سندھ حکومت اختیارات پر قابض ہو کر ناانصافی کر رہی ہے۔ انتخابات دباؤ پر کرا دیئے لیکن اختیارات تاحال نہیں دیئے گئے، جماعت اسلامی کے منتخب چیئرمین اور وائس چیئرمین کو مسائل درپیش ہیں۔ہمارا مطالبہ ہے کونسل کا اجلاس بلایا جائے، بجٹ پیش کیا جائے، کے ایم سی میں بجٹ پیش کیا جائے اور اختیارات دیئے جائیں۔
