کیلی فورنیا (ای پی آئی)گوگل نے ایک نئے فیچر پر کام شروع کر دیا ہے جس کے مطابق جہاز میں سفر کے دوران ایئرپلین موڈ خود بخود ایکٹیو ہو جائے گا۔
میڈیا کے مطابق گوگل نے اس فیچر کے پیٹنٹ کے لیے ورلڈ انٹلیکچول آرگنائزیشن کو درخواست بھی دے دی ہے۔
پارکی فلائی کی رپورٹ کے مطابق یہ فیچر کم پریشر، سپیڈ یا ولاسٹی، کیبن ساؤنڈ، الٹرا سونک سگنلز، جی پی ایس سگنلز، سیلولر آئی ڈی اور وائی فائی سگنلز کو تلاش کر کے آٹومیٹک بیک اپس اور بیک گراؤنڈ ایپلی کیشنز ریفریش کو بند کر دے گا۔’’
گوگل ٹریول بکنگ اور چیک ان سٹیٹس تک رسائی حاصل کر کے بھی اس فیچر کو آن کر دے گا۔ اس کے علاوہ یہ فیچر فلائٹ میں موجود وائی فائی اور بلیو ٹوتھ کو بھی ایکٹیو کر دے گا۔
اس فیچر کے ذریعے مسافروں کو فلائٹ موڈ خود آن نہیں کرنا پڑے گا اور جب وہ اپنی منزل پر لینڈ کر جائیں گے تو یہ فیچر بھی بند ہو جائے گا۔
موجودہ فلائٹ موڈ آن کر نے سے وائی فائی، موبائل نیٹ ورک اور بلیو ٹوتھ سمیت تمام وائرلیس کنکشنز بند ہو جاتے ہیں، لیکن اس نئے فیچر سے بلیو ٹوتھ اور وائی فائی بند نہیں ہوں گے۔
ایک رپورٹ کے مطابق گوگل اینڈرائیڈ کی بورڈ میں ’ان ڈو‘ کا فیچر بھی لے کر آرہا ہے جس کے ذریعے ڈیلیٹ کیے گئے ٹیکسٹ کو واپس لایاجاسکےگا۔ اس فیچر کو ٹیسٹ کیا جا رہا ہے اور جی بورڈ بیٹا ورژن میں مہیا کیا گیا ہے۔