اسلام آباد(عالی جاہ خان) یکم جنوری سے اسلام آباد میں بغیر ایم ٹیگ گاڑیوں کا داخلہ روکنے کا فیصلہ کرلیا گیا وزیر داخلہ کے احکامات پر بغیر ایم ٹیگ گاڑیوں کے خلاف کاروائیاں شروع کی جائیں گی
ڈی سی اسلام آباد نے تمام ایم ٹیگ پوائنٹس پر پراسسنگ تیز کرنے کی ہدایت کردی جبکہ وزیر داخلہ محسن نقوی نے کہا ہے کہ پاکستان کا پہلا شہر اسلام آباد ”کیپٹل سمارٹ سٹی” بنے گا ۔
وزیر داخلہ محسن نقوی کی زیر صدارت سیف سٹی ہیڈکوارٹرز میں اہم اجلاس ہوا ہے اس موقع پر گفتگو کرتے ہوئے وزیرداخلہ کا کہنا تھا کہ یکم جنوری سے اسلام آباد میں بغیر ایم ٹیگ گاڑیوں کے داخلے پر پابندی ہوگی۔
اجلاس میں وزیرداخلہ محسن نقوی نے متعلقہ حکام سے اسلام آباد سیف سٹی کو کیپٹل سمارٹ سٹی بنانے کا جامع پلان طلب کر لیا
وزیر داخلہ محسن نقوی اور وزیر مملکت طلال چوہدری نے سیف سٹی ہیڈکوارٹرز کا دورہ کیا اور ڈیجیٹل وال پر اسلام آباد شہر کی مانیٹرنگ کے نظام کا جائزہ لیا
وزیرداخلہ محسن نقوی نے جدید ٹیکنالوجی کے ذریعے امن عامہ کے اقدامات کا مشاہدہ کیا اور کنٹرول روم میں سپیشل چائنیز ڈیسک پر سیکورٹی سرویلنس کا معائنہ کیا
وزیر داخلہ محسن نقوی نے شہریوں کے جان ومال کے تحفظ کے اقدامات کا جائزہ لیا اور کیپٹل سمارٹ سٹی پر کام تیز کرنے کی ہدایت بھی کی ،ان کا کہنا تھا کہ کیپٹل سمارٹ سٹی میں شہری سہولیات جیسے ریسکیو 1122، ٹریفک، سیکورٹی اور سی ڈی ایم اے کو مرکزی نظام میں ضم کیا جائے گا،کیپٹل سمارٹ سٹی کے سکوپ اور دائرہ کار کو پورے ملک تک بڑھایا جائے گا اور اسلام آباد کو محفوظ ترین شہر بنانے کے لیے کیپٹل سمارٹ سٹی منصوبے کو ماڈل کے طور پر اپنایا جائے گا،
وزیرداخلہ محسن نقوی کا کہنا تھا کہ سیف سٹی میں اصلاحات اور ٹیکنالوجی کا مؤثر استعمال وقت کی اہم ضرورت ہے،
آئی جی اسلام آباد پولیس نے سیف سٹی سے کیپٹل سمارٹ سٹی منتقلی سے متعلق امور پر تفصیلی بریفنگ دی جس میں بتایا گیا کہ محرم الحرام میں سیف سٹی کیمروں کی مدد سے وقت اور وسائل کی بچت ہوئی، وفاقی سیکرٹری داخلہ، چیف کمشنر اسلام آباد۔ ایڈیشنل ڈپٹی کمشنر جنرل۔ اور اعلی حکام بھی اس موقع پر موجود تھے.
دوسری جانب یکم جنوری سے اسلام آباد میں بغیر ایم ٹیگ گاڑیوں کو داخلہ روکنے کا فیصلہ کیا گیا ہے اس سلسلے میں وزیر داخلہ کے احکامات پر بغیر ایم ٹیگ گاڑیوں کے خلاف کاروائیاں شروع کی جائیں گی.
ڈی سی اسلام آبادعرفان نواز میمن نے تمام ایم ٹیگ پوائنٹس پر پراسسنگ تیز کرنے کی ہدایت کرتے ہوئے کہا ہے کہ شہر بھر میں ایم ٹیگ کے لیے مختلف مقامات پر 16 پوائنٹس قائم کیے گئے ہیں،
ان کا کہنا تھا کہ 14 نومبر سے اب تک مجموعی طور پر ایک لاکھ کے قریب گاڑیوں کو ایم ٹیگ جاری کیے گئے ہیں، بغیر ایم ٹیگ گاڑیوں کی ٹیگ ریڈرز کی مدد سے نشاندہی کی جائے گی، ٹیگ ریڈرز کو مختلف انٹری پوائنٹس اور ناکہ جات پر انسٹال کیا گیا ہے، ڈی سی اسلام آباد کا کہنا تھا کہ یکم جنوری سے ٹیگ ریڈرز فعال ہوتے ہی بغیر ایم ٹیگ گاڑیوں کے خلاف کاروائیاں شروع ہو جائیں گی اس لئے
شہری کسی بھی قانونی مشکل سے بچنے کے لیے فوری طور پر اپنی گاڑی کو ایم ٹیگ لگوائیں.
