اسلام آباد(ای پی آئی ) مبینہ آڈیوز لیکس کی تحقیقات کے لئے بنائے گئے کمیشن کے خلاف سپریم کورٹ میں دائر درخواستوں پر سماعت کا تحریری حکمانہ جاری کرتے ہوئے سماعت غیر معینہ مدت تک ملتوی، نوٹیفکیشن کی معطلی کا فیصلہ برقرار رکھنے کا فیصلہ جاری۔
تفصیلات کے مطابق سپریم کورٹ نے انکوائری کمیشن کے خلاف دائر درخواستوں کی گزشتہ سماعت کا حکم جاری کر دیا۔
مبینہ آڈیوز انکوائری کمیشن کے خلاف کیس کے تحریری حکمنامے میں سپریم کورٹ نے قرار دیا ہے کہ اٹارنی جنرل نے بینچ میں شامل تین ججز پر اعتراض اٹھایا۔
اٹارنی جنرل نے کہا کہ تینوں جج صاحبان مقدمہ سننے والے بینچ سے الگ ہو جائیں جبکہ درخواست گزار کے وکیل نے جوابی دلائل دیئے۔
فریقین کے دلائل سننے کے بعد عدالت نے فیصلہ محفوظ کرتے ہوئے بینچ کی تشکیل پر اٹھے اعتراضات کا فیصلہ ہونے تک 26 مئی کا حکمنامہ برقرار رہے گا اور کیس کی سماعت غیر معینہ مدت کے لیے ملتوی کر دی گئی ہے۔
واضح رہے کہ 26 مئی کو سپریم کورٹ نے مبینہ آڈیوز کی تحقیقات کے لیے قائم انکوائری کمیشن کا نوٹیفیکیشن معطل کیا تھا۔انکوائری کمیشن کی تشکیل کے خلاف چار درخواستیں سپریم کورٹ میں دائر کی گئی تھیں۔
خیال رہے کہ مبینہ آڈیو لیکس انکوائری کمیشن کیس میں وفاقی حکومت نے چیف جسٹس پاکستان عمر عطا بندیال، جسٹس اعجاز الاحسن اور جسٹس منیب اختر کی بینچ میں موجودگی پر اعتراض اٹھایا تھا۔
