اسلام آباد (ای پی آئی) امیر جماعت اسلامی حافظ نعیم الرحمن نے گوجرانوالہ میں بنوقابل پروگرام کی افتتاحی تقریب سے خطاب کرتے ہوئے کہا ہے کہ جماعت اسلامی عوام اور خصوصی طور پر نوجوانوں کی اجتماعی قوت سے وہ انقلاب برپا کرے گی جس میں وسائل پر چند لوگ قابض نہ ہوں۔
حافظ نعیم الرحمن نے نوجوانوں کو تلقین کی کہ مایوس نہ ہوں بلکہ ناامیدی پھیلانے والوں کو مایوس کریں، جماعت اسلامی نے ایک پرامن مزاحمتی، سیاسی، قلم اور کتاب کی تحریک کا آغاز کر دیا ہے۔ بنوقابل کے ذریعے ملک کے طول و عرض میں دس لاکھ بچوں اور بچیوں کو فری آئی ٹی تربیت فراہم کر کے انھیں روزگار کے ذرائع فراہم کریں گے، آئی ٹی یونیورسٹی بنا کر تمام بڑے شہروں میں کیمپس قائم کیے جائیں گے۔ بنوقابل کا دائرہ کار گھریلو خواتین تک پھیلا کر انھیں بھی آئی ٹی کی تربیت فراہم کریں گے۔
افتتاحی تقریب میں ہزاروں بچوں اور بچیوں نے ٹیسٹ دیا۔ کامیاب ہونے والوں کو کمپیوٹر اور آئی ٹی سے آگاہی کے مختلف کورسز مفت کرائے جائیں گے۔ سیکرٹری جنرل الخدمت فاونڈیشن سید وقاص انجم جعفری، امیر جماعت اسلامی وسطی پنجاب محمد جاوید قصوری، مرکزی سیکرٹری اطلاعات قیصر شریف، امیر ضلع مظہر اقبال رندھاوا، ریجنل صدر الخدمت خالد احمد شیخ، الخدمت فاؤنڈیشن کے دیگر ذمہ داران سمیت معروف سماجی شخصیات، انفلوئنسرز اور مختلف شعبہ جات سے تعلق رکھنے والی نمایاں شخصیات نے شرکت کی۔
امیر جماعت نے کہا کہ ملک میں 20کروڑ ایسے افراد ہیں جن کی عمریں 40سال تک جب کہ 30سال کی عمر کے 65فیصد افراد ہیں، ہیومن کیپیٹل کو مثبت انداز میں استعمال کیا جائے تو کوئی وجہ نہیں کہ معیشت مضبوط نہ ہو اور ملک ترقی نہ کرے۔
انھوں نے کہا کہ وسائل پر دوفیصد اشرافیہ قابض ہے، یوتھ کو آگے بڑھنے کے مواقع دستیاب نہیں، انھیں جان بوجھ کر مایوس کیا جاتا ہے، تعلیمی اداروں میں منشیات عام ہے، عوام میں عدم تحفظ کا احساس بڑھ رہا ہے، حکمرانوں نے نوجوانوں کو تعلیم سے دور کیا، تعلیمی نظام طبقاتی اور استحصالی ہے، حکمران طبقہ کو مجبور کرنا پڑے گا کہ تعلیم خیرات نہیں عوام کا حق ہے، ملک میں ایک نظام، ایک نصاب اور ایک زبان چاہتے ہیں۔
انھوں نے کہا کہ حکمرانوں نے آئی پی پیز کو دوہزار ارب اس بجلی کی مد میں دیے جو کہ انھوں نے بنائی بھی نہیں، کالجوں، یونیورسٹیوں کے طلبہ و طالبات کی فیس معاف کر دی جائے تو یہ 570ارب بنتا ہے، قابض حکمران کروڑوں نوجوانوں کو 570ارب نہیں دے سکتے چند آئی پی پیز مالکان کو دوہزار ارب دے دیے گئے۔
انھوں نے کہا کہ جماعت اسلامی نوجوانوں کو جدید آئی ٹی ٹریننگ فراہم کرنے کے لیے اپنے تئیں بھرپور کاوش کر رہی ہے، اللہ کی تائید اور عوام کی حمایت سے اقتدار ملا تو اس پورے فرسودہ نظام کو تبدیل کریں گے، وسائل پر ہر شہری کا حق ہو گا۔
انھوں نے کہا کہ جماعت اسلامی نے بنوقابل کا دائرہ کار چاروں صوبوں میں پھیلا دیا ہے۔ نوجوانوں کے لیے لیپ ٹاپ سکیم بھی شروع کریں گے۔ انھوں نے نوجوانوں کو ہدایت کی کہ وہ بنوقابل کے ایمبیسیڈر بنیں، یہ پروگرام ملک میں آئی ٹی کا انقلاب برپا کرے گا، اس پروگرام کے ذریعے کورسز کرنے والوں کا انڈسٹری اور انٹرنیشنل آئی ٹی فرمز سے رابطہ کرائیں گے تاکہ انھیں بہترین روزگار کے مواقع میسر ہوں۔
انھوں نے کہا کہ لاہور میں بنوقابل پروگرام میں 80ہزار نوجوانوں نے اپنے آپ کو رجسٹرڈ کرایا، گوجرانوالہ کے بعد شیخوپورہ اور اس کے بعد دیگر شہروں میں پروگرام کو وسعت دی جائے گی۔